Subscribe to RSS Feed

அடித்தது அலாரம்

on July 28th, 2010 by sakthi
மெல்லியதாய் சிவந்த வானம்
சில்லென்ற குளிர்ந்த காற்று
சல சலத்து ஓடும் நதி
சலனமில்லாத மனம்

சிந்தனையில் தெளிவோடு
கூடிய ஞானம்
பரபரப்பில்லாத
அமைதியான நடை
காட்சியைத் தாண்டிப்
பார்க்கும் வெறுமை
சொந்தம் கொண்டாடாத
அலட்சிய சிரிப்பு

எதையுமே கோபத்தோடு
பார்க்காத குளிர்ந்த இதயம்
பச்சைப் பசும் புல்லின் மென்மை
போன்ற தன்மையான நெஞ்சம்

என்னிடம் எனது என்னும்
எண்னம் இல்லாத
சிறுமையில் பெருமை காணும்
சிந்தனைச் சிறப்புடை மனம்

இவைகள் அனைத்தையும்
அடைந்து விட்டேன் என
நினைத்து மகிழ்ந்தபோது
அடித்து அலாரம்
விழித்துக் கொண்டேன் . . . .

சக்தி சக்திதாசன்

| Posted in கவிதை

Leave a Reply