Subscribe to RSS Feed

உழைப்பில் உதிக்கட்டும் புதிய உலகம்

on July 25th, 2010 by sakthi

manual-workers-hands-1124698 

 

சிந்திடும் வியர்வையில் தோழா

சிதறிடும் எண்ணங்கள் நாளும்

சிந்தித்துப் பார்த்தால் தோழா

சீற்றமே எழுந்திடும் தானாய்

 

எத்தனை காலங்கள் தோழா

இத்தரை மீதினை நீயும்

பொற்தரை ஆக்கிட உழைத்தாய்

தரித்திரம் தானே கண்டாய்

 

பூத்தோரணம் ஆடிடும் மேடையில்

பொய்க் கொள்கைகள் தனையே

பொழிந்திடும் தலைவர்கள்

புரிந்திடுவாரோ உன் சோகம்

 

காலங்கள் எத்தனை மாறினும் உன்

கோலங்கள் மாறவே இல்லையே

ஞாலத்தின் நியாயங்கள் அனைத்தும்

சாலச் சிறந்தவை ஏட்டிலே

 

உருளும் பானையின் ஓசையும்

உடைந்த சட்டியின் வாசமும்

உந்தன் அடுப்பங்கரையிலே

உணரா மனிதரின் கேளிக்கை

 

கல்வியின் பெருமையை உணர்ந்தவர்

கல்விச்சாலையின் வெளியே

காசில் மிதப்பவர் குழந்தைகள்

கசக்கக் கசக்கக் கற்றிடுவார்

 

வறுமையின் நிறமும் சிவப்பா ?

வறியவர் உதிரம் சிவப்பா ?

வாழ்க்கையின் தத்துவம் புரியாமல்

வாடிடும் கூட்டம் ஏக்கத்திலே

 

நாளைகளை மாற்றிட வேண்டுமெனில்

இன்றைய இளைஞர் விழித்திடனும்

ஆணும் பெண்ணும் இணைந்திங்கு

அமைதிப் போரை நடத்திடணும்

 

வன்முறை அற்ற வழிதனிலே

வாழும் முறைதனை மாற்றியமைத்து

கண்ணீர் துடைத்திடும் கருணை கொண்டு

தம்பி, தங்கைகள் புறப்படணும்

 

உலகம் பரந்து விரிந்து கிடக்கிறது

உமது பாதைதானை மூடி இருக்கிறது

அறிவெனும் ஆயுதத்தின் துணையோடு

அரியணை ஏறணும் என் தோழன்

 

இனியும் தூக்கம் வேண்டாம்

இளைய உலகமே விழித்துக் கொள்

அரசியல் என்பதை உண்மையான

அடிப்படை மனிதனின் ஆயுதமாக்கு

 

அழுத முகங்கள் சிரித்திடவும்

உழைத்த கரங்கள் சிறந்தடவும்

உதிக்க வேண்டும் புதியதோர் யுகம்

உழைப்போம் அதற்காய் வாரீர் வாரீர்

 

 

******* சக்தி சக்திதாசன் ******

 

| Posted in கவிதை

Leave a Reply